8 setiembre: día d'Asturies

Un nuevu 8 de setiembre, onde esti añu, distintes persones y organizaciones de la izquierda soberanista asturiana, tres d'un procesu abiertu d'alderique, percorreremos de manera UNITARIA les cais d’Uviéu con un llema conxuntu “Pa tresformar Asturies #LluchandoPolaSoberanía”. Queremos construir otra Asturies pa camudalo too. Pa que seya’l pueblu quien tenga’l mandu de la economía, de los recursos naturales, de les polítiques sociales y culturales a desarrollar, de cómo rellacionanos con otros pueblos.

PROGRAMA:

• 12,30 h: MANIFESTACIÓN, UVIÉU.

Dende'l PASÉU DE LOS ÁLAMOS (Nel Campu S.Francisco, énte la plaza la Escandalera) con delles paraes nes que se van tratar estremaes reivindicaciones (llaborales, estudiantiles, feministes, ecoloxistes...)

• 13,30 h: ACTU POLÍTICU, PLAZA'L PARAGÜES

Intervención unitaria de les convocantes.

Intervenciones d'estremaos movimientos sociales asturianos presentes.

• 14,00 h.:  XINTA POPULAR, MÚSICA NA CAI, XUEGOS TRADICIONALES, CUENTACUENTOS PA LA RECIELLA, BAILLES DEL PAÍS y más na PLAZA'L PARAGÜES

Xinta de xermandía con presencia de música del país, talleres de baille, xuegos tradicionales, cuentacuentos pa neñes y neños, puestos d'organizaciones y coleutivos, bon ambiente, folixa y reivindicación!

Mentanto esti 8 setiembre’l gobiernu asturianu cellebra los sos actos autocomplacientes y promocionales, la rempuesta popular sal a la cai pa manifestar que nun hai nada que cellebrar, y sí muncho que reivindicar.

• Escontra les imposiciones marcaes dende la Troika y l'estáu español reflexaes en retayos, reforma llaboral, LOMCE y llei del albuertu qu'afueguen los nuesos derechos y llibertaes.
• Escontra la crisis económica permanente provocada pol desmantelamientu del texíu productivu de la nación asturiana, col altu desemplegu y la precariedá como constantes derivaes nel tarrén llaboral. Como consecuencia, la emigración forciada de decenes de miles de persones, afeutando especialmente a la mocedá.
• Pa combatir l’avieyamientu demográficu y la perda de población, asina como’l desmantelamientu del mundu rural asturianu. 
• P’aparar les agresiones mediuambientales y l’espoliu de recursos naturales pal beneficiu d’empreses privaes. 
• Valió de polítiques gubernamentales aculturizadores, y de desigualdá de drechos según la llingua que fales. 

Pa que seya’l pueblu asturianu quien tenga’l mandu de la economía, de los recursos naturales, de les polítiques sociales a desarrollar, de cómo rellacionanos con otros pueblos: en definitiva, pa siguir caminando na construcción de la nuesa soberanía.

Pa tresformar Asturies, #LluchandoPolaSoberanía

Más info: Espaciu Social la Llegra